Mat 27 | WSK | STEP | Ukiram tumong biyala priest bibiya se kari supuling suen biya nuna Jesus momon se kuerukko den nungurman.

Matthew 27

Nuna Jesus Pilate kuting te beteman

(Mark 15:1; Luke 23:1-2; John 18:28-32)

1 Ukiram tumong biyala priest bibiya se kari supuling suen biya nuna Jesus momon se kuerukko den nungurman. 2 Ale kuting kaloman, ale diruwuman ilak nama Rome ko kari biya Pilate kuting te beteman.

Judas kueram

(Apostle 1:18-19)

3 Se Judas, kari Jesus kager kari nuguting te beteram, mu nuna Jesus kuera ko lage te betemonko iwita arigam. Umutang te nu kilek memek beteram mu ko ikiam ale biririkiram. Ale ko manga silver biling 30 tuman mu giam karogo peleram priest bibiya se kari supuling nongote ago namaram 4 ale balam, “Ani memek beterem pa!” mam. “Ani kari kumik den mena wore kager kari nuguting te beterem se kuerukko pa!” mam.

Se nuna nu manorman, “Mu anananga mel mena! Mel mu nika la!”

5 Se mu ko Judas manga iluwaram mu temple ningi waram ale aratam eng namaram mayang te numi dogotak paogam ale kueram.

6 Se priest bibiya manga aliti aniram mu taman ale balman, “Imi mu gue manga,” maman, “kari mora se kuera wore ko diara. Se ana manga imi temple ko manga karogo biguwunak,

mu ana Law Den kiasan,” ma balman.

7 Ale ko munakaman nama ko den nungurman ale manga umutang te ali bo kariimet iwareng te nunga mutim tugumonko mu diamonko balman. Ale eng ali bo, ko nup “Kari kani nungursan wore nunga ali” ma balsan, umutang diaman. 8 Umutang ko ali nukung mu balsan “Ali Gue Ago” masan, eng tai aitak tom imi te.

9 Se den prophet Jeremiah giram balam mu ko nunguning aratam. Nu iwita balam: “Kari Biya aga maonam butata, Israel kariimet manga silver biling 30 kari owore te diamonko beteman, 10 ale manga umutang kari kani nungursan nunga ali mu te diaman.” ^{▼▼Mat 27:9-10 Zechariah 11:12-13; Jeremiah 19:1-13; 32:6-9.}

Pilate Jesus isarukaso

(Mark 15:2-5; Luke 23:3-5; John 18:33-38)

11 Jesus Rome ko kari biya Pilate moke te sanamaram se nu isuam, “Ni Juda nunga king e?”

Se Jesus balam, “Se ni ta balsam ta.”

12 Se priest bibiya se Law Den ko kausa kari den atumu tuikasan. Bare nu nononga den mu ko koma me balukaso.

13 Se Pilate nu isuam, “Ni den suen la atumu kisisan wore me ikisam e?” mam.

14 Bare Jesus den koma bo me ta balam. Se mu te Pilate ari bita ko biririkiram ale ikia moakaso. ^{▼▼Mat 27:12-14 Jesus sipsip iwita kutek mam ale den bo me balukaso: Isaiah 53:7.}

Jesus tam kangono te tagimonko Pilate balam

(Mark 15:6-15; Luke 23:13-25; John 18:39-19:16)

15 Yar suen biya te Passover tom tai aratukaso mu Rome ko kari biya nu talipara kari bo, awiriya kariimet ko balukasan, mu nu kutuwu nungarukaso. 16 Se yar mu te kari bo ko nup Barabbas i mu talipara kawam ningi bagakaso, se kariimet nu ko ko ikia biya.

17 Se tom nuna den ariga kuwim te tai biguwuman mu Pilate nunga isuam, “Kari awuk bore ani kutuwu ningarikko nengemang aniso ya? Barabbas agi, kari Jesus nuna arusan ‘Kristus’ masan wore ye?” mam. 18 Buta balam, mu awuk, nu ikiam mu kariimet suen biya Jesus ko kuakasan se umutang ko Juda kari bibiya noko nongomang magaram se ilak tai nu kuting te beteman. ^{▼▼Mat 27:18 Juda kari bibiya Jesus ko nongomang magaram: John 11:47-48; 12:18-19.}

19 Se Pilate nu den ariga ko kuwim te dagiwaram mu ko nuwus den bo beteram se kote tairam, mu iwita balam: “Ni kari kumik den mena sumu aguwaya ilak me bitarko! Ani turom nu kumik ko ipingira memek arigem, ale ko ikia ninguru aga moso,” mam.

20 Bare priest bibiya alo se kari supuling bibiya mu kariimet nongomang atumukasan, ale nunga manarukasan, “Nina Pilate maonal se nu Barabbas kutuwu nangaruk, ale baluk se Jesus mu momon se kuerukko,” makasan.

21 Se tom Rome ko kari supuling nunga isuam, “Ilagala ewere ningi bo awuk bore ani kutuwu ningarikko ya?” mam, mu nuna balman, “Barabbas i,” makasan.

22 Se aking Pilate nunga isuam, “Se kari Jesus, arusan Kristus masan, wore ani anape kilek kumik te bitirikko ya?”

Se nuna suen la balman, “Tam kangono te tagiralko!” makasan.

23 Se Pilate nunga isuam, “Nu anape memek beteram se ya?” mam.

Bare nuna am sail karogo la balukasan, “Am tam kangono te tagiralko,” makasan.

24 Se Pilate ikiam, nu aguwaya baluk bare mu me terong maukko mu ikiam. Ale betela nu ikiam mu kager biya aratukko tom katirta iwita arigam. Se nu yu sang tam, ale kariimet motam biya animan mu nomokete kuting anuwam, ale balam, “Kari imi ko gue kapuruk, mu ani angimik den mena. Mu nenenga mel la,” mam.

25 Se kariimet singir la noko den koma iwita balman, “Kari imi ko gue kapuruk, mu ko ikup ana nanga kuriang arungu am ginakko!” maman. ^{▼▼Mat 27:25 Nuna nuguting gue ago: Mat 23:35.}

26 Mu te Pilate Barabbas kutuwu nungaram. Ale balam, se Jesus mayang whip te lilumaman. Asele tam kangono te tagimonko ko kager kari nuguting te beteram.

Kager kari gusia kilek Jesus kumik te beteman

(Mark 15:16-20; John 19:2-3)

27 Se Pilate ko kager kari mu Jesus diruwuman kawam biya mu ko dun sang nuna te bagara mu te ilak namaman, ale kager kari suen biya nunga aruman se tai biguwuman ale Jesus kusumuri beteman. 28 Ale ko guang mu kutuwu sapaman, ale guang bo diriyam kataru tuman. 29 Ale mayang kore karogo mu taman ale lapik ko kereman, ale crown iwita supuling tuguman. Ale yom kuting bo taman, ale king ko sikir iwita kuting sengam mu te beteman. Ale koma dugu te nubugura kulukurukasan ale den dolara iwita manarukasan, “O Juda nunga king, tom maiya biya bagurukko tawo!” makasan. 30 Ale kumik kuali katingirukasan, ale yom kuting ko kuting te aniram mu tokasan ale ko supuling te moakasan. 31 Nuna dolara tui kutuwuman mu guang diriyam mu kutuwuman ale kota ko guang aking kataru tuman. Asele taman ale tam kangono te tagimonko ilak namakasan. ^{▼▼Mat 27:28-31 Isaiah giram mel imi ko balam: 50:6; 53:3,7.}

Nuna Jesus tam kangono te tagiman

(Mark 15:21-32; Luke 23:26-43; John 19:17-27)

32 Se nuna lage te namawa se Cyrene kari bo ^{▼▼Mat 27:32 Cyrene mu Africa sor te, Libya ali sor mu te ko wonong bo.}, ko nup Simon, mu aringiman, ale Jesus ko tam kangono giokko iluman ale guguna tuman. 33 Se giam se eng nama kuwim bo ko nup Golgotha mu te arataman. Nup Golgotha mu ko nunguning mu “Supuling Sokel ko Sor” masan. 34 Se Golgotha sor mu te, nu kumik yaman me te ikiokko nuna yu waen mel saki karogo guruguman ale tuman. Bare nu no arigam meram, ale me nam.

35 Se nuna tam kangono te tagiman. Ale ko guang kutuwu giman mu nunumi pagaru tumonko se ko kola gilingikasan. ^{▼▼Mat 27:35 David den balam mu ko nunguning aratam: Psalm 22:18.} 36 Asele dagiman nu bitaruwakasan. 37 Se duap aguwaya se Jesus moman mu ko den mu tam bilik te batagorman se supuling ko kualala tagiman se anikaso. Se den mu iwita balam, IMI MU JESUS, JUDA NUNGA KING. 38 Se tere daong kari ilagala, bo Jesus kuting sengam ko, se bo ko kuting ngas ko mu te ago nunga tagiman. ^{▼▼Mat 27:38 Isaiah den balam mu ko nunguning aratam: 53:12.}

39 Se kariimet nama taikasan mu nuna Jesus ari se nusupuling sisuwuwakasan ale den dolara tuikasan, 40 “Ni kari ewerta temple parasuwur ale tom ilagala suwan te aking iru mu kaloko ma balem e?” makasan. “Ikiko! Ni Kaem ko Kuriang agi mu, keta nimi sangaru to ale tam kangono bitar ale aliti tai kapar se karkanakko!” makasan.

41 Se uwutatala, priest bibiya, se Law Den ko kausa kari bibiya, se kari supuling supuling, nuna den dolara tuikasan ale balukasan, 42 “Nu saki alo nunga saongam, bare nu kota numi sangukko me terong uwoya!” makasan. “Nu ana Israel nanga king agi mu, aitakta ewerta te tam kangono bitiruk ale tai kapuruk se aringinak ale ana ko nangamang ningi nunguning arukko!” makasan. 43 “Nu Kaem ko gomang ningi nunguning maso, ale numi balso, ‘Ani Kaem ko Kuriang,’ maso. Se Kaem nu ko kueso agi, mu aitakta am sanguk se aringinakko!”

44 Se uwutatala, tere daong kari ilagala Jesus kumik duap te nunga tagiman mu nuna karogotala den memek nu tuikasan. ^{▼▼Mat 27:39-44 Nuna den dolara tuikasan: Psalm 22:7-8.}

Jesus kueram

(Mark 15:33-41; Luke 23:44-49; John 19:28-30)

45 Se worem motam tai dirmam, 12 o'clock, mu sor koma umutang lilim la tiromorom iram nama worem motam 3 o'clock bainga ningi. 46 Se 3 o'clock te iwita Jesus biyala airam ale balam, “Eli, Eli, lama sabaktani?” mam. Se den balam imi ko duap mu iwita, “Aninga Kaem, aninga Kaem, ni awuk se aga bita taem?” ^{▼▼Mat 27:46 Jesus ko den balam mu Psalm 22:1 te aniso.}

47 Se kari saki pingi sanamingaman mu aira mu ikiman ale ko iwita balman, “Nu Elijah aruwoso!” maman. 48 Se nunga ningi bo tairate naguram namaram ale sirarep bo tam, ale waen aora mu ningi mituwuram, yom kuting ko kopa te atumam ale Jesus misikirokko kore sumulak te beteram.

49 Bare saki balman, “Me neger se ana Elijah tairuk sangaru taukko agi wore aringinakko,” maman.

50 Se Jesus aking biyala airam mu te noko marak nu bita tam se nu eng kueram.

51 Se tom mu te la, temple ningi guang biya aromemek kuwim kako nunguningkiri mu te kaloman se kekawaram mu norogen kualala mu te baraka duap beteram, ale kapa nukum te kutuwa palagam ale biling ilagala aratam. ^{▼▼Mat 27:51 Guang temple ningi mu biling ilagala aratam: Exodus 26:33; Hebrews 10:19-20.} Se ali yukuakaso se manga bibiya papak makasan, 52 se ali motam betelatala kuring kaigakasan. Se Kaem ko kariimet saki suen nuam ta maingkala kueman mu aking maragakasan 53 ale nunga kuera mutim kuringi aratu barasu sanamikasan. Se udagi te, tom Jesus barasam mu te, nuna wonong kako Jerusalem ningi kasu naguman se kariimet suen biya nungarkaman.

54 Se kager kari supuling ko kari arungak Jesus ari se animan, mu wanara kaparam se mel kasik biya aratam se aringiman, ale ninguru nguangaman ale balukasan, “Nunguningta kari imi Kaem ko Kuriang!” makasan.

55 Se imet suen biya nuna Galilee la Jesus sangaru se ilak taiman, mu nuna awar nuam ta sanamaman ale ariwakasan. 56 Imet ari mu nunga ningi mu Magdala wonong ko imet Maria mu se, Maria bo James Joseph nunga nunam mu se, Zebedee ko kuriangari ilagala James John mu nunga nunam mu buta nuna imet umu nunga ningi bagakasan.

Nuna Jesus ko kumik guang mutim tuguman

(Mark 15:42-47; Luke 23:50-55; John 19:38-42)

57 Sor baingawaram se Arimathea kari bo, ko nup Joseph, nu kari kumik mel suen biya ago, wore tairam. Mu nu betela Jesus ko olekem bo. 58 Se nu Pilate kote namaram ale Jesus ko kumik guang taukko isuam. Se Pilate ko kager kari nunga maonam se ilak namaman ale kutuwu tuman. 59 Se Joseph Jesus ko kumik guang tam ale karogo nama guang bo iru siraram wore te isi gurugam, 60 ale kota ko ali motam bo, manga garap naung ningi iru la nunguru beteman, mu ningi beteram. Asele manga aromemek bo gurugam ale kuring te baguram, ale eng namaram. ^{▼▼Mat 27:60 Isaiah giram mel imi ko balam: 53:9.} 61 Se Magdala imet Maria, se Maria bo tala, mu nuna ilagala ali motam koma ko dagiman ale bagakasan.

Kager kari ali motam bitarman bagakasan

62 Sabbath tom ko nunumi nunga burangara ko tom mu nama kutuwam. ^{▼▼Mat 27:62 Sabbath tom te Juda alo me te ura tamonko, se girikasan mel nunguru burangikasan. Tom Friday bainga ningi worem nama kapuruk mu Sabbath tom duap bitirukko.} Se Sabbath tom mu te priest bibiya alo se Pharisee alo biguwuman ale Pilate kote namaman, 63 ale iwita manorman, “Kari biya, tom kawel kari mu marak bagara la nu iwita balam, ‘Ani kuerik ale tom ilagala suwan mu te aking barasikko,’ mam, se noko den balam mu ana nangamin te am aniso. 64 Buta se ni balu se ali motam wore tom ilagala suwan ko ninguru sinar tamonko, noko olekem alo namomon kumik guang tetela la tamon ale kariimet nunga kulurmon, ale iwita nunga manarmon, ‘Nu kueram ale aking maragaram,’ mamon, se kawel umutang nama au kapuruk ale kawel motam motam bitakaso mu nunga kiaruk bore ko.”

65 Se Pilate nunga maonam, “Bitua kari sang nunga gial arungak namaral ale ali motam ninguru bagural ale ko sinar talko.”

Se nuna ali motam te namaman ale mayang bo manga ali motam te baguman wore karogo kaloman, ale dun sing sang te tagi karogo nama kaloman. Asele bitua kari sang mu nunga awuman se ko sinar to se animan.

66